– આરટીઓ અને કલેક્ટર કચેરીમાં રજૂઆત

– શાળાના મુદત વધારાની મંજૂરીની પ્રક્રિયા શરૂ કરવાની માંગ : ઉકેલ નહીં આવે તો હડતાળ ચાલુ રાખવાની ચીમકી

સુરેન્દ્રનગર: નવા શૈક્ષણિક સત્રના પ્રારંભના પ્રથમ દિવસે આરટીઓ વિભાગે શાળાએ જતા વાહનોનું ચેકીંગ કરી કાયદેસરની કાર્યવાહી હાથ ધરી હતી. જેમાં સ્કૂલ રિક્ષા, સ્કૂલ બસો ડીટેઈન કરવામાં આવી છે. આ મામલે સ્કૂલ બસના ચાલકોમાં રોષ જોવા મળ્યો હતો અને તેઓએ હડતાળ પર ઉતરી જિલ્લા કલેક્ટર કચેરી અને આરટીઓ કચેરીમાં ઉગ્ર રજૂઆતો કરી હતી.

નવા શૈક્ષણિક વર્ષના પ્રથમ દિવસે આરટીઓએ સુરેન્દ્રનગર અને વઢવાણ સહિત અન્ય તાલુકાઓમાં ચેકીંગ હાથ ધર્યું હતું. જેમાં નિયમોનો ભંગ કરનાર અને ક્ષમતા કરતા વધુ વિદ્યાર્થીઓને બેસાડનાર અને ફાયર સેફટીનો ભંગ કરનાર શાળા વાહન ચાલકો સામે કડક કાર્યવાહી કરવામાં આવી હતી.

સુરેન્દ્રનગર અને લીંબડીમાં નિયમોનું પાલન ન કરનાર સ્કૂલ રિક્ષા ચાલકો, વાન ચાલકો અને સ્કૂલ બસના ચાલકો સહિત 13 ચાલકો સામે કાર્યવાહી કરવામાં આવી હતી. આ ઉપરાંત બે સ્કૂલ બસો પણ ડિટેઈન કરવામાં આવી હતી. તંત્રના આ ચેકીંગના પગલે શાળામાંથી પસાર થતા વાહન ચાલકોમાં રોષ જોવા મળ્યો હતો.

જીનતાન રોડ પર આવેલ જીન કમ્પાઉન્ડ ખાતે મોટી સંખ્યામાં વાહનચાલકો એકત્ર થયા હતા અને તંત્ર સામે વિરોધ કરવા માટેની રણનીતિ અંગે ચર્ચા-વિચારણા કરી હતી. જે બાદ જિલ્લા કલેક્ટર કચેરી ખાતે આવા અન્ય આગેવાનોની હાજરીમાં ઉગ્ર રજૂઆતો કરવામાં આવી હતી.

જેમાં આરટીઓ વિભાગમાં તપાસ કરીને શાળાએ જતા વાહનચાલકોને થતી હેરાનગતિ અને માનસિક ત્રાસ અંગે રજૂઆત કરવામાં આવી હતી અને તંત્ર દ્વારા નિયમોનું પાલન કરવા માટે થોડો સમય આપવામાં આવે તેવી માંગણી કરવામાં આવી હતી. તેમણે નિયમોનું પાલન કરવા માટે સ્થાનિક આરટીઓ કચેરી પાસેથી જરૂરી પરવાનગી મેળવવાની વ્યવસ્થા કરવાની પણ માંગ કરી હતી.

આરટીઓ વિભાગ દ્વારા તગડો દંડ વસૂલવામાં આવતો હોવાના આક્ષેપ સાથે તંત્ર દ્વારા સામાન્ય દંડની રકમ વસૂલીને વાહનચાલકોને થોડો સમય આપવામાં આવે તેવી માંગણી કરી છે. જો માંગ નહીં સ્વીકારાય તો હડતાળ ચાલુ રાખવાની ચિમકી ઉચ્ચારી છે.

આરટીઓ દ્વારા કરાયેલા ચેકિંગના વિરોધમાં રિક્ષા, વાન, બસ સહિત 100 જેટલા ચાલકો હડતાળ પર ઉતરી જતાં અનેક વાલીઓને નવા શૈક્ષણિક વર્ષના પ્રારંભે બાળકોને શાળાએ ઉપાડવા અને મૂકવા જવાની મુશ્કેલીઓનો સામનો કરવો પડે છે. આથી આ પ્રશ્નોનો તાકીદે ઉકેલ લાવવામાં આવે તેવી વાલીઓની માંગ છે.

આરટીઓના નિયમો મુજબ સ્કૂલમાં ચાલતા રિક્ષા, વાન વગેરે સહિતના ચાલકોએ અલગથી પરમિટ લેવી પડે છે, પરંતુ મોટાભાગના સ્કૂલ બસના ચાલકો પાસે આવી કોઈ પરમિટ ન હોવાનું જાણવા મળ્યું છે.