પોરબંદરમાં ભારે વરસાદ સૌરાષ્ટ્રમાં ધોધમાર વરસાદ પડી રહ્યો છે. પોરબંદરના ઘેડ પંથકના 19 ગામોને ભારે વરસાદના પગલે હાઈ એલર્ટ પર રાખવામાં આવ્યા છે. ધોરાજી નજીક ભાદર 2 ડેમ 100 ટકા ભરાઈ જતાં તેનું પાણી ઘેડ પંથકમાં વહી જાય છે. જેના કારણે તંત્ર દ્વારા ગ્રામજનોને એલર્ટ કરવામાં આવ્યા છે.

મોરબીના 21 ગામોને એલર્ટ કરાયા છે

મોરબી જિલ્લામાં પણ મેઘરાજાએ જોરદાર બેટિંગ કરી છે. ભારે વરસાદને પગલે મચ્છુ 3 ડેમનો દરવાજો વધુ એક ફૂટ ખોલવામાં આવ્યો છે. અત્યાર સુધી ડેમમાંથી બે ફૂટના દરવાજા ખોલીને પાણી છોડવામાં આવી રહ્યું છે. હાલમાં મચ્છુ ડેમમાં 1255 ક્યુસેકની આવક સામે 1674 ક્યુસેકની જાવક છે. તો મોરબી અને માળીયા મિયાણા તાલુકાના 21 ગામોને એલર્ટ કરાયા છે.

રામતલિયા નદીમાં પૂર આવ્યું

અમરેલીના રાજુલા, જાફરાબાદ, ખાંભામાં આજે વહેલી સવારથી પવન સાથે મુશળધાર વરસાદ શરૂ થયો છે. રાજુલાના ડુંગર, મોરંગી, માંડલ, વિક્ટર, કુંભારિયા, દેવકા અને અન્ય ગામોમાં ભારે વરસાદ પડી રહ્યો છે. વરસાદના કારણે મોરંગી ગામની રામતલિયા નદીમાં પૂર આવ્યું છે.

આ પણ વાંચોઃ ગુજરાતમાં અવિરત વરસાદ, ભારે વરસાદની આગાહીને પગલે આ જિલ્લામાં શાળા-કોલેજોમાં રજા જાહેર

સૌરાષ્ટ્રમાં મેઘરાજાએ પાણીનો બોમ્બ વરસાવ્યો

આ ઉપરાંત યાત્રાધામ દ્વારકામાં 10 ઈંચ સહિત દેવભૂમિ દ્વારકા જિલ્લામાં ભારે વરસાદ થયો છે. રાજકોટ જિલ્લામાં ખાસ કરીને ધોરાજી, ઉપલેટા, જેતપુર, ગોંડલ પંથકમાં 8 ઈંચ ધોધમાર વરસાદ ખાબક્યો હતો. સોમવારે રાજકોટ શહેરની આસપાસ એક ઈંચ અને જામનગર જિલ્લામાં એકથી ચાર ઈંચ, મોરબી, ટંકારા સહિતના જિલ્લાઓમાં ત્રણથી ચાર ઈંચ અને અમરેલી જિલ્લામાં 3 ઈંચ સુધી મેઘરાજાએ સમગ્ર સૌરાષ્ટ્રમાં ઝાપટા વરસાવ્યા હતા.

ભારેથી અતિ ભારે વરસાદની આગાહી

રાજ્યમાં છેલ્લા ત્રણ દિવસથી પડી રહેલા મેઘમહેરને પગલે ગુજરાતમાં સરેરાશ વરસાદ વધીને 14 ટકા થયો છે. હવામાન વિભાગે આજે (2 જુલાઈ) સુરત, નવસારી, વલસાડ, દમણ, દાદરા અને નગર હવેલી, જામનગર, પોરબંદર, જૂનાગઢ, દ્વારકા, કચ્છમાં ભારે વરસાદ માટે રેડ એલર્ટ જાહેર કર્યું છે. જ્યારે બનાસકાંઠા, પાટણ, પંચમહાલ, દાહોદ, વડોદરા, છોટા ઉદેપુર, નર્મદા, ભરૂચ, ડાંગ, તાપી, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, મહિસાગર, સુરેન્દ્રનગર, બોટાદમાં ભારેથી અતિભારે વરસાદ માટે ઓરેન્જ એલર્ટ. , દીવમાં ભારે વરસાદ માટે યલો એલર્ટ જારી કરવામાં આવ્યું છે.

.