અમદાવાદ, રવિવાર
શહેરના શાહપુરમાં રહેતા અનીશાબેન બેલીમના પુત્ર મહંમદ બિલાલ બેલીમને શાહપુરમાં રહેતા કરીમખાન સૈયદ અને તેના પુત્રો મોહસીન, ઈમરાન અને વસીમે છરીના 40 ઘા ઝીંકી માર માર્યો હતો. આ મામલે શાહપુર પોલીસે હત્યાનો ગુનો નોંધી ચારેય આરોપીઓની ધરપકડ કરી રિમાન્ડ મેળવ્યા હતા અને સાબરમતી જેલમાં મોકલી આપ્યા હતા. આ કેસમાં સાબરમતી જેલમાં રહેલા પિતા અને ત્રણ પુત્રોએ ઘણી વખત જામીન માટે અરજી કરી હતી. પરંતુ, નીચલી કોર્ટમાંથી હાઇકોર્ટમાં જામીન અરજી દાખલ કરવામાં આવી હતી. પરંતુ, ઘટનાની ગંભીરતા અને નિર્દયતાને ધ્યાનમાં રાખીને તમામને જામીન આપવાનો ઇનકાર કરવામાં આવ્યો હતો. તે જ સમયે આરોપીએ જેલમાંથી ફોન કરીને સમાધાન કરવાની ધમકી આપી હતી. આ અંગે શાહપુર પોલીસે ગુનો નોંધ્યો હતો. જે બાદ મામલો થાળે પાડવાના અનેક પ્રયાસો કરવામાં આવ્યા હતા. પરંતુ, ફરિયાદ પક્ષ દ્વારા કોઈ જવાબ આપવામાં આવ્યો ન હતો. થોડા દિવસ પહેલા અનીષાબેન બજારમાં જતા હતા ત્યારે સમીર ઉર્ફે બિહારી નવસાદ શેખ (રબ. બત્તાની બિલ્ડીંગ, પેરેડાઈઝ કોમ્પ્લેક્ષ, શાહપુર) નામનો યુવક તેમની પાસે આવ્યો હતો અને તેને ધમકી આપી હતી કે જો તું કેસનો ઉકેલ નહીં લાવે તો જાનથી મારી નાખશે. બીજા પુત્રને પણ ગુમાવવો પડશે. આ બાબતે અનીષાબેન ગભરાઈ ગયા હતા અને આરોપી સામે કાયદેસરની કાર્યવાહી કરવા શાહપુર પોલીસ સ્ટેશનમાં અરજી કરી હતી. પરંતુ, 40 ઘા ઝીંકીને યુવકની હત્યાના ગંભીર મામલામાં પોલીસે ધમકી આપનાર સામે કાર્યવાહી કરવાને બદલે સાદી કેફિયત ગણી માત્ર નિવેદન આપીને સંતોષ માની લીધો હતો. ત્યારે આ મામલે શાહપુર પોલીસની નિષ્ક્રિયતા સામે અનેક સવાલો ઉભા થયા છે. ઉલ્લેખનીય છે કે મોહમ્મદ બિલાલ બેલીમને માર્યા પહેલા તેના પર હુમલો કરવામાં આવ્યો હતો. ત્યારે પણ પોલીસે સામાન્ય અરજી લઈને કાર્યવાહી કરી હતી. જેના કારણે આરોપીઓએ પોલીસની બીક રાખ્યા વગર તેની નિર્દયતાથી હત્યા કરી નાખી હતી. આમ, ફરીથી ધમકી મળતા અનીષાબેનને ડર છે કે આરોપીઓ જેલમાં રહીને તેમના પુત્રો કે પરિવારના અન્ય સભ્યોને નિશાન બનાવી શકે છે. ત્યારે શાહપુર પોલીસે ઉચ્ચ પોલીસ અધિકારીઓને આ મામલે કાયદેસરની કાર્યવાહી કરવા અને ગુનો નોંધવા રજૂઆત કરી છે.
