ગુજરાત વરસાદ અપડેટ: ગુજરાતમાં દક્ષિણ પશ્ચિમ ચોમાસાનું સત્તાવાર આગમન બે અઠવાડિયા પહેલા થયું હતું. પરંતુ સાનુકૂળ ગતિ ન મળવાને કારણે ચોમાસાનું વર્ચસ્વ જોવા મળ્યું ન હતું. પરંતુ હવે આખરે ગુજરાતમાં ચોમાસું આવી ગયું છે. ગઈકાલે રાજ્યના 66 તાલુકામાં મેઘમહેર નોંધાઈ હતી. જેમાં જૂનાગઢના મેંદરડામાં બે કલાકમાં 3 ઈંચ વરસાદ ખાબક્યો હતો. કાલાવડમાં પણ વરસાદ પડ્યો હતો. હવામાન વિભાગ દ્વારા આગામી બે દિવસ રાજ્યમાં ભારેથી અતિભારે વરસાદની આગાહી કરવામાં આવી છે.

જૂનાગઢ જિલ્લામાં ગઈકાલે મેઘરાજાની પધરામણી

જૂનાગઢ જિલ્લામાં લાંબી પ્રતિક્ષા બાદ આખરે ગઈકાલે મેઘરાજાની પધરામણી થઈ હતી. જેમાં મેંદરડામાં ચાર ઈંચ અને ગ્રામ્ય વિસ્તારોમાં ત્રણથી પાંચ ઈંચ વરસાદ પડયો હતો. જ્યારે જૂનાગઢ અને વંથલી પંથકમાં અઢી ઈંચ વરસાદ નોંધાયો હતો. વિસાવદરમાં બે ઈંચ, માળીયા હાટીનામાં દોઢ ઈંચ, કેશોદમાં એક ઈંચ ભારે પવન સાથે જ્યારે ભેંસાણમાં વરસાદ પડ્યો હતો. માંગરોળમાં બે મીમી વરસાદ નોંધાયો છે.

રાજકોટમાં પણ રાત્રિ સુધીમાં 1 ઈંચ વરસાદ નોંધાયો હતો

રાજકોટમાં પણ જાણે મેઘરાજા રવિવારની મોજ માણવા આવ્યા હોય તેવો માહોલ જોવા મળ્યો હતો. બપોર બાદ વાતાવરણમાં પલટો આવ્યો હતો. અને મેઘરાજાની ભવ્ય એન્ટ્રી થઈ હતી. રાજકોટમાં રાત્રિ સુધીમાં 1 ઈંચ વરસાદ નોંધાયો હતો. ગોંડલ પંથકમાં બપોર બાદ આકાશમાં પલટો આવ્યા બાદ આકાશમાં વાદળો છવાયા હતા.

અમરેલી જિલ્લામાં ગઈકાલે સાર્વત્રિક વરસાદ

અમરેલી જિલ્લામાં ગઈકાલે બપોર બાદ વ્યાપક વરસાદ થયો હતો. લાઠી તાલુકામાં બપોર બાદ વાતાવરણમાં પલટો આવ્યો હતો અને 28 મીમી વરસાદ પડ્યો હતો. અમરેલી જિલ્લામાં સતત વરસી રહેલા વરસાદને કારણે જિલ્લાના ખેડૂતોમાં ખુશી જોવા મળી હતી. અમરેલીમાં પણ ઝાપટા પડ્યા હતા.

જામનગર શહેરમાં આવતીકાલે રાત્રે ધીમીધારે વરસાદ

જામનગર શહેરમાં રાત્રે 8:45 વાગ્યાની આસપાસ વરસાદ શરૂ થયો હતો. ત્યારે ગાજવીજ સાથે મેઘરાજાનું સ્વાગત કરાયું હતું. મોરબી શહેરમાં સાંજે પવન સાથે વરસાદ શરૂ થયો હતો, મોરબી શહેરના રામ ચોક, નવા બસ સ્ટેન્ડ, રવાપર રોડ, સામાકાંઠે સહિતના વિસ્તારોમાં વરસાદ પડ્યો હતો. જેથી બાળકો સહિત લોકો વરસાદમાં ન્હાવા નીકળી પડ્યા હતા.

સુરત શહેરમાં અડધો ઇંચ વરસાદ

શનિવારે સાંજે 6 વાગ્યાથી રવિવારે સાંજે 6 વાગ્યા સુધીના 24 કલાકમાં વરસાદ પડ્યો હતો, જેમાં શનિવારે રાત્રે સુરત શહેર અને જિલ્લામાં સર્વત્ર ધોધમાર વરસાદ પડ્યો હતો અને ગઈકાલે ઓલપાડ, ચોર્યાસી અને સુરતમાં અડધો ઈંચ વરસાદ પડ્યો હતો.

આમ, છેલ્લા 24 કલાકમાં સુરત જિલ્લામાં સૌથી વધુ વરસાદ સુરત શહેરમાં બે ઈંચ, ઓલપાડમાં દોઢ ઈંચ, માંગરોળ, માંડવી, મહુવામાં 1 ઈંચ અને તમામ તાલુકાઓમાં નોંધપાત્ર વરસાદ નોંધાયો હતો. સુરત શહેર-જિલ્લામાં છેલ્લા 24 કલાકમાં કુલ 167 મીમી અને સરેરાશ અડધો ઈંચ વરસાદ નોંધાયો છે. મોસમનો અત્યાર સુધીનો કુલ વરસાદ 526 મીમી અને સરેરાશ વરસાદ 2.1 ઈંચ છે.

રાજ્યના 26 તાલુકામાં 1 થી 2.5 ઈંચ વરસાદ

દેવભૂમિ દ્વારકાના ખંભાળિયા તાલુકામાં 3 ઈંચ, છોટા ઉદેપુરના સંખેડા તાલુકામાં અઢી ઈંચ, ડાંગના સુબીર તાલુકામાં અઢી ઈંચ, બનાસકાંઠામાં પણ મેઘરાજાની એન્ટ્રી થઈ છે, પંચમહાલના હાલોલમાં પણ પવન સાથે વરસાદ થયો છે, અને ભાવનગરમાં પણ મેઘરાજાની એન્ટ્રી થઈ છે. ગઈકાલે મેઘરાજાની પધરામણી.

આગામી 3 દિવસ ક્યાં વરસાદની આગાહી…

જૂન 24: નર્મદા-સુરત-ડાંગ તાપીમાં ભારેથી અતિ ભારે. ભરૂચ-નવસારી-સૌરાષ્ટ્ર-કચ્છમાં ભારે વરસાદની આગાહી જ્યારે અમરેલી, ગીરસોમનાથ…

અમદાવાદ, ગાંધીનગર, બનાસકાંઠા, પાટણ, વડોદરા, છોટાઉદેપુર, રાજકોટ, જામનગર, દ્વારકા, બોટાદ, કચ્છમાં હળવાથી મધ્યમ વરસાદની અપેક્ષા છે.

જૂન 25: દાહોદ, છોટા ઉદેપુરમાં ભારેથી અતિ ભારે. ઉત્તર ગુજરાત અને સૌરાષ્ટ્ર-કચ્છમાં ભારે વરસાદની આગાહી છે.

જૂન 26: બનાસકાંઠા, સાબરકાંઠામાં ભારે વરસાદની આગાહી