બોટાદમાં બરવાળા ફેક્ટરીમાં બ્લાસ્ટઃ બોટાદ જિલ્લાના બરવાળા પંથકમાં શુક્રવારે (21મી માર્ચ)ના રોજ મોટી દુર્ઘટના સર્જાઈ છે. બેલા અને ટીંબાળા ગામની સીમમાં આવેલી ફટાકડાની ફેક્ટરીમાં અચાનક વિસ્ફોટ થતા આગ ફાટી નીકળી હતી. આ અકસ્માતમાં એક કામદારનું ઘટનાસ્થળે જ મોત થયું હતું, જ્યારે ફેક્ટરીના માલિક સહિત અન્ય એક કામદાર ગંભીર રીતે દાઝી ગયા હતા.
બ્લાસ્ટ એટલો જોરદાર હતો કે પાંદડા 100 મીટર દૂર સુધી ઉખડી ગયા હતા
મળતી માહિતી મુજબ, ફટાકડાની ફેક્ટરીમાં જે રૂમમાં વિસ્ફોટક કાચા માલનો સંગ્રહ કરવામાં આવ્યો હતો, ત્યાં અચાનક આગ લાગી અને મોટો ધડાકો થયો. વિસ્ફોટની તીવ્રતા એટલી ભયાનક હતી કે ફેક્ટરીના શેડના પતરા લગભગ 100 મીટર દૂર ખેતરોમાં પટકાયા હતા. બ્લાસ્ટને કારણે ઘાયલોના શરીરના ભાગો પણ દૂર સુધી ફેંકાઈ ગયા હતા. આસપાસના વિસ્તારમાં ભૂકંપ જેવો આંચકો અનુભવાયો હતો.
જ્યારે બે લોકો ગંભીર રીતે ઘાયલ થયા હતા
આ ઘટનામાં કુલ ત્રણ વ્યક્તિઓ આગની લપેટમાં આવી ગયા હતા. બ્લાસ્ટમાં મજૂર હાર્દિક સોલંકીનું ઘટનાસ્થળે જ મોત થયું હતું. જ્યારે કારખાનાના માલિક ભૂપત વ્યાસ ગંભીર રીતે દાઝી જતાં વધુ સારવાર અર્થે ભાવનગર ખસેડાયા છે અને કામદાર જયદીપ ગંભીર ઇજાઓ સાથે બોટાદની હોસ્પિટલમાં સારવાર હેઠળ છે.
ઘટનાની જાણ થતાં જ 108 એમ્બ્યુલન્સ અને બરવાળા પોલીસનો કાફલો ઘટનાસ્થળે દોડી ગયો હતો. ફાયર ફાયટરોએ ભારે જહેમત બાદ આગ પર કાબુ મેળવ્યો હતો. અકસ્માતની ગંભીરતાને ધ્યાને લઈ ડીવાયએસપી સહિતના ઉચ્ચ અધિકારીઓ અને પ્રાંત અધિકારીઓ ઘટના સ્થળે પહોંચી ગયા હતા.