અમદાવાદ સમાચાર: અમદાવાદ શહેરના વિવાદાસ્પદ હાટકેશ્વર બ્રિજના ડિમોલિશન દરમિયાન આજે સાંજે ગંભીર અકસ્માત સર્જાયો હતો. મ્યુનિસિપલ કોર્પોરેશન દ્વારા નિયુક્ત કરાયેલા કોન્ટ્રાક્ટરની બેદરકારીના કારણે બ્રિજ નીચે મૂકેલી રેતી અને કોંક્રીટની વિશાળ કોથળીઓ અચાનક પડી જતાં એક મહિલા મજૂર ઘાયલ થઈ હતી.
હાટકેશ્વર બ્રિજના ડિમોલિશનમાં ઘોર બેદરકારી
હાલ હાટકેશ્વર ઓવરબ્રિજના ડિમોલિશનની અંતિમ તબક્કાની કામગીરી ચાલી રહી છે. મુખ્ય માર્ગ પરના બે સ્પાન તોડવા માટે કોન્ટ્રાક્ટર દ્વારા રેતી અને કોંક્રીટથી ભરેલી મોટી પ્લાસ્ટિકની કોથળી નીચે પાડી દેવામાં આવી હતી, જેથી બ્રિજના ડિમોલિશન વખતે કાટમાળ સીધો નીચે આવી જાય. જોકે, 10 માર્ચની સાંજે આ બેગ અચાનક ફાટી ગઈ હતી.
બ્રિજ નીચે લારી લઈને ઉભેલી એક મહિલા આ બેગ નીચે કચડાઈ ગઈ હતી. સ્થાનિક લોકો તાત્કાલિક મહિલાને બહાર કાઢવા દોડી આવ્યા હતા. આ ઘટનામાં મહિલાને ઈજા થઈ હતી અને તેની લારી અને સામાનને પણ નુકસાન થયું હતું.
આ પણ વાંચોઃ ગુજરાત ATS મુંબઈમાં ક્રેશ! 22 કિલો ઇટોમિડેટ સાથે 2 આરોપી ઝડપાયા, આંતરરાષ્ટ્રીય ડ્રગ નેટવર્કનો પર્દાફાશ
તંત્ર અને કોન્ટ્રાક્ટરની ઘોર બેદરકારી
આ ઘટનાને લઈને સ્થાનિકોમાં ભારે રોષ જોવા મળી રહ્યો છે. આ અકસ્માત પાછળ મુખ્યત્વે નીચેની બેદરકારી બહાર આવી છે. કાર્યસ્થળ પર સલામતી માટે કોઈ સાઈન બોર્ડ કે બેરીકેડીંગ ન હતા. હાટકેશ્વર રોડ અત્યંત વ્યસ્ત હોવા છતાં મહાપાલિકાના બ્રિજ પ્રોજેક્ટ વિભાગે રસ્તો બંધ કર્યા વિના જોખમી કામગીરી ચાલુ રાખી હતી.
ઘટના બાદ મોટી સંખ્યામાં લોકો ઉમટી પડ્યા હતા અને કોન્ટ્રાક્ટરના માણસો સામે રોષ વ્યક્ત કર્યો હતો. સદનસીબે મોટી જાનહાનિ ટળી છે પરંતુ આ ઘટનાએ કોર્પોરેશનની કામગીરી અને સુરક્ષા વ્યવસ્થા સામે મોટા સવાલો ઉભા કર્યા છે.