સુરત કોર્પોરેશન : સુરત મહાનગરપાલિકાના કચરા કૌભાંડમાં તપાસ પુરી ન થતાં અને કૌભાંડીઓ સામે પગલાં લેવાયા નથી ત્યારે પાલિકાના સફાઈ કામદારોનું ભૂતિયા હાજરી કૌભાંડ પ્રકાશમાં આવ્યું છે. સુરત મહાનગરપાલિકાના આઠમા ઝોનમાં આરોગ્ય વિભાગના સિનિયર કર્મચારીઓની મિલીભગતથી સફાઈ કામદારોની બોગસ હાજરીનું કૌભાંડ આચરાઈ રહ્યું હોવાનું વિજિલન્સ તપાસમાં બહાર આવ્યું છે. આઠમા ઝોનમાં બાયોમેટ્રિક હાજરી ન હોવા છતાં રજિસ્ટરમાં હાજરી પુરી હોવાનું વિજિલન્સ ચેકિંગમાં જાણવા મળતાં બે સફાઈ કામદારોને સસ્પેન્ડ કરવામાં આવ્યા છે. જ્યારે મિલ્લી ભગતમાં જે લોકોનું કૌભાંડ થયું છે તેની તપાસ કરવામાં આવી રહી છે અને જો જવાબદાર જણાય તો તેમની સામે પણ કાર્યવાહી કરવામાં આવી રહી છે.
સુરત મહાનગરપાલિકા સ્વચ્છતા લીગમાં અગ્રેસર રહી તેમાં સફાઈ કામદારોનો ઘણો ફાળો છે. મોટા ભાગના સફાઈ કામદારો નિષ્ઠાપૂર્વક કામ કરી રહ્યા છે જ્યારે કેટલાક સફાઈ કામદારો ઉચ્ચ અધિકારી-કર્મચારીઓને ધ્યાને લીધા વગર પાલિકાનો પગાર ઉઠાવી રહ્યા છે. પાલિકાના સફાઈ કામદારોમાં બોગસ હાજરીનું કૌભાંડ ચાલતું હોવાની ફરિયાદ બાદ મ્યુનિસિપલ ડે.કમિશનર દિનેશ ગુરવે આ અંગે તપાસ વિજિલન્સ વિભાગને જાણ કરી છે. દરમિયાન આઠમા ઝોનમાં આવેલી પનાસ વોર્ડ ઓફિસમાં બોનસ હાજરીનું કૌભાંડ બહાર આવ્યું હતું.
આઠમા ઝોનમાં સફાઈ કામદાર તરીકે કામ કરતા રાકેશ કુમાર મકવાણા અને શૈલેષની બાયોમેટ્રિક હાજરી ન હતી પરંતુ રજિસ્ટર તપાસતા રજિસ્ટરમાં નિયમિત હાજરી હોવાનું બહાર આવ્યું હતું. આ સફાઈ કામદારોને કુલપતિ ભવનથી અટોમવ્રતા દ્વાર ઓવરબ્રિજ સુધીના માર્ગની સફાઈ માટે નિયુક્ત કરવામાં આવ્યા હતા. પરંતુ સીસીટીવી ફૂટેજમાં આ કર્મચારીઓ કામમાં હાજર ન હોવાનું સ્પષ્ટપણે જોવા મળ્યું હતું. આ ઉપરાંત ઘણી વખત બાયોમેટ્રિક હાજરી સાવ ગાયબ થઈ જતી હોવાનું પણ બહાર આવ્યું હતું.
આ સફાઈ કામદારોને જાન્યુઆરી 2025 થી ફેબ્રુઆરી 2026 ના સમયગાળામાં હાજરીપત્રક અને બાયોમેટ્રિક હાજરી વચ્ચે મોટી વિસંગતતા જોવા મળી હતી. તેથી તેમને તાત્કાલિક અસરથી સસ્પેન્ડ કરવામાં આવ્યા છે. આ સમગ્ર કેસમાં એવું પણ પ્રકાશમાં આવ્યું છે કે, બંને સફાઈ કામદારો ઉપરી કર્મચારીઓની મિલીભગતથી આયોજનબદ્ધ રીતે બાયોમેટ્રિક હાજરી ભરીને નિયમિત કામગીરી માટે જ સ્થળ પર આવતા ન હતા. આગામી દિવસોમાં વિજીલન્સ રિપોર્ટના આધારે આઠમા ઝોનના મુકાદમ, એસએસઆઈ, એસઆઈ સામે આયોજનબધ્ધ રીતે કૌભાંડ આચરવાના મુદ્દે કાર્યવાહી થાય તેવી શક્યતા નકારી શકાતી નથી. પનાસની વોર્ડ ઓફિસમાંથી આ કૌભાંડ બહાર આવ્યું છે, અન્ય જગ્યાએ પણ આવી જ તપાસ કરવામાં આવે તો બોગસ હાજરીનું કૌભાંડ બહાર આવે તેવી શક્યતા છે.