સુરત સમાચાર: સુરતના ભાટપોર વિસ્તારમાં એક ચોંકાવનારી ઘટના સામે આવી છે. ઘરના આંગણામાં મુક્તપણે રમી રહેલા બે વર્ષના માસૂમ બાળકને ઝેરી કોબ્રા સાપ કરડતાં તેનું કરૂણ મોત નીપજ્યું હતું. રોજી રોટી માટે આવેલા શ્રમિક પરિવાર પર આભ ફાટતાં સમગ્ર વિસ્તારમાં રોષ ફેલાયો છે.
મૂળ છોટાઉદેપુરના અને હાલ સુરતના ભાટપોર ગામની પોસ્ટ ઓફિસ પાલિયામાં રહેતા દિનેશભાઈ નાડલા રાઠવાના પરિવાર સાથે આ દુર્ઘટના બની હતી. શુક્રવારે સાંજે તેનો 2 વર્ષનો પુત્ર અન્ય બાળકો સાથે ઘરના આંગણામાં રમી રહ્યો હતો. ત્યારે એક ઝેરી કોબ્રા અચાનક આવીને બાળકના જમણા પગને કરડ્યો. બાળકીને સાપ કરડતાની સાથે જ પગમાંથી લોહી નીકળવા લાગતા પરિવાર દોડી આવ્યો હતો.
તેમના પુત્રને સાપ કરડ્યો હોવાની જાણ થતાં જ પિતા દિનેશભાઈ તેમને તાત્કાલિક સારવાર માટે ભાટપોરના સ્થાનિક ક્લિનિકમાં લઈ ગયા હતા. જો કે બાળકની હાલત નાજુક હોવાથી તેને વધુ સારવાર માટે સુરતની નવી સિવિલ હોસ્પિટલમાં ખસેડવામાં આવ્યો હતો. કમનસીબે સાપનું ઝેર આખા શરીરમાં ફેલાઈ જતાં સિવિલના ફરજ પરના તબીબોએ માસૂમને મૃત જાહેર કર્યો હતો.
6 ફૂટ લાંબા કોબ્રાનો બચાવ
ઘટનાની જાણ થતા આસપાસના ગ્રામજનો એકઠા થઈ ગયા હતા. ખૂબ જ પ્રયત્નો બાદ લોકોએ બાળકને ડંખ મારનાર અંદાજે 6 ફૂટ લાંબા કોબ્રાને બચાવી લીધો હતો. સિવિલ હોસ્પિટલમાં બાળકનું પોસ્ટમોર્ટમ કરાવી લાશ પરિવારજનોને સોંપવામાં આવી હતી. આ ઘટના બાદ શ્રમિક પરિવારમાં શોકનું મોજું ફરી વળ્યું છે.