સુરત કોર્પોરેશન ડિમોલીશન : સુરત મહાનગરપાલિકાના સેન્ટ્રલ ઝોનના દબાણ માટે કુખ્યાત એવા નવસારી બજારમાંથી લાંબા સમય બાદ પાલિકા તંત્રએ દબાણ હટાવવાની કાર્યવાહી હાથ ધરી છે. ગઈકાલે મોડી સાંજે દબાણો હટાવાયા બાદ ટ્રાફિકની સમસ્યા હળવી થઈ હતી. પરંતુ આગામી દિવસોમાં ફરીથી કામગીરી કરવાની ફરજ ન પડે તેવી સ્થાનિકોની માંગ છે.

સુરત મહાનગરપાલિકાના સેન્ટ્રલ ઝોનમાં આવેલી રાજશ્રી પાણીની ટાંકી નવસારી બજાર સર્કલથી તલાવડી રોડ સુધીના રોડની બંને બાજુ તેમજ નવસારી બજાર સર્કલથી નવા ખ્વાજા દાણા રોડ સુધીના રોડ અને ફૂટપાથ પર ગેરકાયદેસર રીતે દબાણ કરવામાં આવી રહ્યું છે. આ દબાણને કારણે ટ્રાફિકની ભારે સમસ્યા સર્જાય છે અને લોકોને ભારે હાલાકી ભોગવવી પડી રહી છે. આ દબાણકર્તાઓ લુખ્ખા તત્વો હોવાથી પાલિકા કાયમી ધોરણે દબાણ દૂર કરી શકતી નથી.

જોકે, ગઇકાલે લાંબા સમય બાદ પાલિકાના સેન્ટ્રલ ઝોનના અધિકારીઓએ પોલીસ બંદોબસ્ત સાથે દબાણ હટાવવાની કામગીરી કરી હતી. જેમાં 12 ખુલ્લી લારીઓ, સાત બંધ લારીઓ, 10 કાઉન્ટર, 16 લોખંડના ટેબલ, 9 કબાટ અને 12 પાણીની ટાંકીઓ અને ક્ષતિગ્રસ્ત સામાન જપ્ત કરવામાં આવ્યો છે. આજે દબાણ હટાવવાથી ટ્રાફિકની સમસ્યા હળવી થઈ હતી પરંતુ આ સમસ્યા કાયમી ધોરણે દૂર કરી દબાણ કાયમી ધોરણે દૂર કરવામાં આવે તેવી સ્થાનિકો માંગ કરી રહ્યા છે.