જેતપુર કાપડ ઉદ્યોગ જેતપુર શહેર અને પંથકની જીવાદોરી સમાન કાપડ અને સાડી ઉદ્યોગ હાલમાં ગંભીર આર્થિક સંકટનો સામનો કરી રહ્યો છે. મધ્ય પૂર્વમાં ચાલી રહેલા યુદ્ધની સીધી અને ગંભીર અસર જેતપુરના ડાઇંગ અને પ્રિન્ટિંગ ઉદ્યોગ પર પડી છે. કાચા માલના ભાવમાં અસહ્ય વધારો અને કોમર્શિયલ એલપીજી ગેસની અછતને કારણે અનેક મશીન પ્રિન્ટીંગ યુનિટ બંધ થઈ ગયા છે, જેના કારણે હજારો કામદારોની રોજગારી જોખમાઈ છે.
ગગનચુંબી ઉત્પાદન ખર્ચ
જેતપુર ડાઇંગ એન્ડ પ્રિન્ટિંગ એસોસિએશન દ્વારા તાજેતરમાં મળેલી કારોબારીની બેઠક બાદ મહત્વનો પરિપત્ર બહાર પાડવામાં આવ્યો છે. સેક્રેટરી ચેતનભાઈ જોગીની સહી હેઠળ જારી કરાયેલા પત્ર મુજબ પ્રિન્ટિંગ અને ફિનિશિંગ માટેના રંગો, રસાયણો અને પેકિંગ મટિરિયલના ભાવમાં 20 ટકાથી 30 ટકાનો વધારો થયો છે. આ સિવાય એકમોમાં ઈંધણ તરીકે વપરાતા કોલસા અને ગેસના ભાવમાં પણ 20 ટકાથી 30 ટકાનો વધારો થયો છે. આ અસહ્ય બોજને સરભર કરવા માટે, એસોસિએશને પ્રિન્ટીંગ જોબમાં પ્રતિ મીટર રૂ. 2 અને સાડી દીઠ રૂ. 10નો તાત્કાલિક ભાવવધારો લાગુ કરવાનો સર્વાનુમતે નિર્ણય લીધો છે.
ડાઈંગ એન્ડ પ્રિન્ટિંગ એસોસિએશનના પ્રમુખ જયંતિભાઈ રામોલિયાએ આ વિકટ પરિસ્થિતિ અંગે ચિંતા વ્યક્ત કરતાં જણાવ્યું હતું કે, ‘અત્યાર સુધી નુકસાન સહન કરવા છતાં કારખાનાઓ કોઈપણ રીતે યુનિટ ચલાવતા હતા જેથી મજૂરોને રોજીરોટી મળતી રહે. પરંતુ, હાલમાં યુદ્ધની વ્યાપક અસરને કારણે LPG કોમર્શિયલ ગેસના પુરવઠામાં ભયંકર અછત સર્જાઈ છે. પરિણામે, જેતપુરમાં કેટલીક મશીનરી ફરજિયાતપણે બંધ કરી દેવામાં આવી છે અને મોટાભાગના ટેક્સટાઇલ એકમોમાં ઉત્પાદન એકદમ નીચે આવી ગયું છે.’
આ પણ વાંચોઃ ગુજરાતના 7 જિલ્લામાં 16352 જમીનો ‘બિનખેતી’, કેમ ધરતીવાસીઓનો મોહભંગ!
80 હજારથી વધુ કામદારોના દૈનિક વેતન પર કટોકટી
જેતપુરના આ ઉદ્યોગ સાથે 80,000 જેટલા કામદારો પ્રત્યક્ષ કે પરોક્ષ રીતે જોડાયેલા છે. આટલા મોંઘા કાચા માલ અને ગેસની અછત વચ્ચે ઉત્પાદકો હાલમાં તેમના એકમો કેમ ચલાવવા અને હજારો લોકોને રોજગારી આપવા તે મૂંઝવણનો સામનો કરી રહ્યા છે. જો ટૂંક સમયમાં પરિસ્થિતિમાં સુધારો નહીં થાય તો શહેર અને તાલુકાની આર્થિક વ્યવસ્થા, નાના-મોટા આનુષંગિક ઉદ્યોગો અને વેપારીઓના ધંધા-રોજગાર પર ખૂબ જ ગંભીર અને ગંભીર અસરો પડશે.