ગુજરાત ATSએ યુપીમાં ગેરકાયદેસર ડ્રગ લેબનો પર્દાફાશ કર્યો: ઉત્તર પ્રદેશના રામપુર ગામની સીમમાં ખેતરમાં ચાલતી ડ્રગ્સ લેબોરેટરીનો ગુજરાત ATS દ્વારા પર્દાફાશ કરવામાં આવ્યો છે. આ મામલે સોહિલ મિર્ઝા અને ફરહાદ પઠાણ નામના બે લોકોની ધરપકડ કરવામાં આવી છે. આરોપીઓએ અંતરિયાળ વિસ્તારમાં ત્રણ નાના તંબુ બાંધ્યા હતા અને શંકાથી બચવા માટે તેમને ‘પોલ્ટ્રી ફાર્મ’ તરીકે ઓળખાવ્યા હતા અને તેની આડમાં ડ્રગ મેન્યુફેક્ચરિંગ નેટવર્ક ચલાવ્યું હતું.
ગુજરાત ATSએ યુપીના રામપુર ફાર્મમાં ચાલતી ડ્રગ્સ લેબોરેટરીનો પર્દાફાશ કર્યો છે
આ દરોડા દરમિયાન સ્થળ પરથી 6 કિલો તૈયાર MD ડ્રગ્સ અને 50 કિલો પ્રવાહી મળી આવ્યું છે. તપાસમાં જાણવા મળ્યું કે આ લેબોરેટરીમાં લગભગ 30 થી 35 કિલો એમડી દવાઓ બનાવવાની ક્ષમતા હતી અને તે છેલ્લા ત્રણ-ચાર મહિનાથી કાર્યરત હતી. આરોપી સોહિલ મિર્ઝાએ અગાઉ પંકજ અને કપિલને 300 ગ્રામ ડ્રગ્સ આપ્યું હોવાનું પણ બહાર આવ્યું છે. હાલ કોર્ટે આરોપીના 12 દિવસના રિમાન્ડ મંજૂર કર્યા છે અને વધુ તપાસ ચાલુ છે.
ગુજરાત ATSના DIGએ જણાવ્યું હતું કે, ‘1 માર્ચે અમદાવાદમાં શકત અહેમદ ફારૂકી પાસેથી 4.6 ગ્રામ એમડી ડ્રગ્સ ઝડપાયા બાદ તેની પૂછપરછ દરમિયાન દાણીલીમડાના સોહિલ મિર્ઝા અને ફરહાન પઠાણના નામ બહાર આવ્યા હતા. આ આરોપીઓના રિમાન્ડ દરમિયાન મળેલી માહિતી અનુસાર, પંકજ અને કપિલ નામના શખ્સોએ તેમને એમડી ડ્રગ્સનો જથ્થો સપ્લાય કર્યો હતો. ખાનગી અને એન્ક્રિપ્ટેડ એપ્લિકેશનનો ઉપયોગ કરવા છતાં અમારી ટીમે ઉત્તર પ્રદેશમાં બંનેના લોકેશનને ટ્રેક કર્યું, જ્યાં તેઓ ખેતરોમાં પોલ્ટ્રી ફાર્મની આડમાં શંકાસ્પદ ગતિવિધિઓ કરતા હોવાનું જણાયું હતું.’
આ પણ વાંચો: બનાસકાંઠા: ઉન ગામમાં બે સમુદાયો સામસામે, વાહનોમાં તોડફોડ, પરિસ્થિતિને કાબૂમાં લેવા પોલીસે ટીયર ગેસના સેલ છોડ્યા
વધુ માહિતી આપતા પોલીસ અધિકારીએ જણાવ્યું કે, ‘અમારી ટીમે ઉત્તર પ્રદેશ પોલીસની મદદથી રામપુર ગામમાં એક ખેતરમાં દરોડા પાડીને એક છુપી લેબોરેટરીનો પર્દાફાશ કર્યો છે. ત્યાંથી અમે 6 કિલો રેડીમેડ MD, 50 કિલો લિક્વિડ મેફેડ્રોન અને 88 કિલોગ્રામ તાજેતરમાં પ્રતિબંધિત બ્રોમોફોર મિથાઈલ પ્રોપિયોફેનોલ સહિત 200 કિલોથી વધુ કાચો માલ અને મશીનરી જપ્ત કરી છે. આ મામલે કપિલદેવ શર્મા અને રામશંકર ઉર્ફે પંકજની ધરપકડ કરવામાં આવી છે, જેઓ પ્રાથમિક તપાસમાં છેલ્લા ત્રણ-ચાર મહિનાથી આ કામ કરી રહ્યા હતા.’