પંચમહાલ સમાચાર: પંચમહાલના ગોધરા શહેરમાં તસ્કરો હવે રાજકીય નેતાઓને પણ નિશાન બનાવી રહ્યા છે. શહેરની શાંતિ નિવાસ સોસાયટીમાં રહેતા ભાજપ યુવા મોરચાના જિલ્લા મહામંત્રી વિવેક શાહની સ્કોર્પિયો કાર અજાણ્યા તસ્કરો ચોરી કરી ફરાર થઈ ગયા છે.
રાત્રે સોસાયટીમાંથી ચોરી
મળતી માહિતી મુજબ, ભાજપના નેતા વિવેક શાહે તેમની સ્કોર્પિયો કાર રાબેતા મુજબ શહેરની શાંતિ નિવાસ સોસાયટીમાં આવેલા તેમના ઘરના આંગણામાં પાર્ક કરી હતી. સોસાયટીમાં મોડી રાત્રે તસ્કરો ઘૂસી ગયા હતા અને ચોકકસપણે કારની ચોરી કરી હતી. સવારે પરિવારજનો જાગ્યા ત્યારે ઘરના દરવાજે કાર મળી ન હતી અને ચોરી થયાની જાણ થઈ હતી.
ચોરીની સમગ્ર ઘટના નજીકમાં લાગેલા સીસીટીવી કેમેરામાં કેદ થઈ ગઈ છે. ફૂટેજમાં અજાણ્યા તસ્કરો કારની ચોરી કરીને લઈ જતા સ્પષ્ટ દેખાય છે. આ ફૂટેજના આધારે પોલીસે તસ્કરોનું પગેરું દબાવવા ચક્રો ગતિમાન કર્યા છે.
આ પણ વાંચો: છોટા ઉદેપુરના રમડિયા ખાતે ‘ગોળ ફર્યાનો મેળો’: બાધાને પૂર્ણ કરતા લાકડાના પ્લેટફોર્મ પર ગોળ-ગોળ ફરવાની અનોખી પરંપરા, વિદેશીઓને આકર્ષે છે
પોલીસ તપાસમાં તેજી
બનાવ અંગે વિવેક શાહે ગોધરા પોલીસ મથકે ફરિયાદ નોંધાવી છે. પોલીસે અજાણ્યા તસ્કરો સામે ગુનો નોંધી તપાસ શરૂ કરી છે. રહેણાંક વિસ્તારમાંથી ભાજપના એક અધિકારીની કારની ચોરી થતાં સ્થાનિક રહીશોમાં ભય અને ગભરાટનો માહોલ જોવા મળી રહ્યો છે. લોકો હવે પોલીસ પેટ્રોલીંગ વધારવા માંગ કરી રહ્યા છે.