બોમ્બની ધમકી: વડોદરા અને અમદાવાદમાં ફરી બોમ્બની ધમકીના ઈમેલ મળ્યા છે. જેમાં શહેરની ઉર્મિ, ડી.આર.અમીન, નાલંદા, જીવનસાધના, શાનેન સ્કૂલ, નવયુગ સ્કૂલ અને અમદાવાદની 4 સ્કૂલોને ઈમેલ દ્વારા બોમ્બથી ઉડાવી દેવાની ધમકી મળતાં તંત્ર હરકતમાં આવ્યું છે.
વડોદરામાં 5 શાળાઓને બોમ્બથી ઉડાવી દેવાની ધમકી
વડોદરાની 5 શાળાઓને બોમ્બથી ઉડાવી દેવાની ધમકીભર્યા ઈમેલ મળ્યા બાદ શાળા સંચાલકો દ્વારા તાત્કાલિક ધોરણે મુક્ત કરવામાં આવી છે. તેમજ ઉર્મિ સ્કૂલની હોસ્ટેલને પણ સાવચેતીના પગલારૂપે ખાલી કરાવવામાં આવી છે. બોમ્બની ધમકીની માહિતી મળતા શહેરના ઉચ્ચ પોલીસ અધિકારીઓ સહિતનો મોટો કાફલો ઘટનાસ્થળે દોડી ગયો હતો. પરિસ્થિતિની ગંભીરતાને ધ્યાનમાં રાખીને, બોમ્બ સ્ક્વોડ (BDDS) અને ડોગ સ્કવોડની મદદથી શાળાની તપાસ કરવામાં આવી રહી છે.
અમદાવાદની 4 શાળાઓને પણ ધમકીભર્યા ઈમેલ મળ્યા હતા
અમદાવાદની 4 શાળાઓને પણ બોમ્બથી ઉડાવી દેવાની ધમકી મળી હોવાનું સામે આવ્યું છે. જેમાં વસ્ત્રાપુરની એશિયા સ્કૂલ, એ વન સ્કૂલ ઓફ સેટેલાઈટ, મકરબાની ડીએવી ઈન્ટરનેશનલ સ્કૂલ, અંકુર ઈન્ટરનેશનલ સ્કૂલને ધમકીભર્યા ઈમેલ મળતાં તંત્ર દોડતું થઈ ગયું છે. બોમ્બની ધમકીને પગલે શાળા ખાલી કરાવવામાં આવી છે અને તંત્ર દ્વારા સઘન તપાસ હાથ ધરવામાં આવી છે.
આ પણ વાંચોઃ રાજુ કરપડાએ સુરેન્દ્રનગર સાયબર ક્રાઈમમાં AAPના 3 નેતાઓ સામે કેસ કર્યો
અગાઉ 23 જાન્યુઆરી 2026ના રોજ અમદાવાદ શહેરની જાણીતી શાળાઓને ઈમેલ દ્વારા બોમ્બની ધમકી મળી હતી. જેમાં સંત કબીર સ્કૂલની 3 શાખાઓ, ભોપાલની ડીપીએસ નવરંગપુરાની સેન્ટ ઝેવિયર્સ લોયોલા, ઘાટલોડિયાની કેલોરેક્સ સ્કૂલ, વસ્ત્રાપુરની સ્વયમ સ્કૂલ અને એપલ ગ્લોબલ સ્કૂલને નિશાન બનાવીને આ ધમકીભર્યો ઈમેલ મોકલવામાં આવ્યો હતો. ઘટનાની ગંભીરતાને ધ્યાને લઈ પોલીસ, બોમ્બ સ્કવોડ અને ક્રાઈમ બ્રાન્ચની ટીમોને તાત્કાલિક સક્રિય કરી દેવામાં આવી છે. ધમકીભર્યા મેલમાં લખવામાં આવ્યું હતું, ‘મોદી-શાહ ખાલિસ્તાનના દુશ્મનો, તમારા બાળકોને બચાવો’
અગાઉ કલેક્ટર કચેરીને ઈ-મેલ મોકલવામાં આવ્યો હતો
આપને જણાવી દઈએ કે અગાઉ ડિસેમ્બર મહિનામાં પણ વડોદરા શહેરના દિવાળીપુરા વિસ્તારમાં આવેલી જિલ્લા કલેક્ટર કચેરીને એક અનામી ઈ-મેલ દ્વારા બોમ્બથી ઉડાવી દેવાની ધમકી આપવામાં આવી હતી. જેને લઈને સમગ્ર સરકારી તંત્ર અને પોલીસમાં દોડધામ મચી ગઈ હતી. જેમાં તકેદારીના પગલારૂપે તાત્કાલિક અસરથી કલેક્ટર કચેરીને ખાલી કરાવવામાં આવી હતી.
