AMC સમાચાર: 1-જુલાઈ-1950ના રોજ અમદાવાદને મ્યુનિસિપાલિટીમાંથી મ્યુનિસિપલ કોર્પોરેશનનો દરજ્જો મળ્યો. તેના 76 વર્ષના ઈતિહાસમાં આઠમી વખત કોઈ વહીવટદાર લગભગ બે મહિનાના સમયગાળા માટે કોર્પોરેશનની બાગડોર સંભાળે તેવી શક્યતા છે. ડ્રાફ્ટ મતદાર યાદી 19મી ફેબ્રુઆરીએ જાહેર થવાની છે.વર્તમાન મેયર સહિત પાંચ પદાધિકારીઓની મુદત 9મી માર્ચે પૂરી થઈ રહી છે.આ સ્થિતિમાં થોડા સમય માટે કોર્પોરેશનમાં રાજકીય શૂન્યાવકાશ સર્જાશે.
અમદાવાદ મ્યુનિસિપલ કોર્પોરેશનમાં વીસ વર્ષથી સત્તામાં રહેલા ભાજપ માટે છેલ્લા અઢી વર્ષ કપરા સાબિત થયા છે. ખાસ કરીને 40 કરોડના ખર્ચે બનેલો હાટકેશ્વર બ્રિજ તોડી પાડવો પડ્યો હતો. આ ઉપરાંત સુભાષબ્રિજ સહિત અન્ય અનેક પુલના સમારકામ અને પુનઃનિર્માણની કામગીરીને કારણે શહેરના અનેક માર્ગો પર ડાયવર્ઝન થતાં લોકો પરેશાન બન્યા છે.
આ ઉપરાંત કોર્પોરેશનના બગીચા વિભાગ દ્વારા કરાયેલા કરોડો રૂપિયાના વિવાદાસ્પદ ટેન્ડરને કારણે શાસક પક્ષની પ્રતિષ્ઠા ખરડાઈ છે. ભાજપના કોર્પોરેટરો તેમના વોર્ડમાં પ્રાથમિક સુવિધાના કામો કરાવી શક્યા નથી. નિકોલમાં દસ્ક્રોઇના ધારાસભ્યની સાથે અસારવાના ધારાસભ્યને પણ લોકોના વિરોધનો અનુભવ કરવો પડ્યો હતો.
આટલા વર્ષોમાં પ્રથમ વખત કોર્પોરેશનમાં વિપક્ષ નબળો હોવા છતાં શાસક પક્ષ કફોડી હાલતમાં હોય તેવી સ્થિતિનો અહેસાસ શહેરીજનો જ નહીં ભાજપના કોર્પોરેટરો, પદાધિકારીઓ અને ધારાસભ્યો પણ કરી રહ્યા છે. આ કારણોસર, ભાજપનું નેતૃત્વ પણ હાલની 159 બેઠકોમાં કોઈ ઘટાડો ઇચ્છતું નથી. આ કારણોસર પણ એડમિનિસ્ટ્રેટર મુકી શકાય છે.
